ആദ്യ വുഡന്‍ സാറ്റ്‌ലൈറ്റ് (മരം കൊണ്ട് നിര്‍മിച്ച പുറംപാളിയുള്ള കൃത്രിമ ഉപഗ്രഹം) ബഹിരാകാശത്തേക്ക് അയച്ച് ജപ്പാന്‍.
ചൊവ്വാഴ്‌ച രാവിലെയായിരുന്നു വിക്ഷേപണം.
പതിവ് ലോഹ പാളി മാറ്റി പ്ലൈവുഡ് കൊണ്ട് നിര്‍മിച്ചിരിക്കുന്ന ഈ കുഞ്ഞന്‍ കൃത്രിമ ഉപഗ്രഹത്തിന് പേരിട്ടിരിക്കുന്നത് ലിഗ്നോസാറ്റ് എന്നാണ്. തടി കൊണ്ടുള്ള ഉല്‍പന്നങ്ങള്‍ വളരെ സങ്കീര്‍ണമായ ബഹിരാകാശ കാലാവസ്ഥയെ എങ്ങനെ അതിജീവിക്കുമെന്ന് ഈ വുഡന്‍ സാറ്റ്‌ലൈറ്റ് അയച്ചത് വഴി മനസിലാക്കാന്‍ കഴിയുമെന്നാണ് ജപ്പാനിലെ ശാസ്ത്രജ്ഞരുടെ പ്രതീക്ഷ.
പാര്‍പിട നിര്‍മാതാക്കളായ സുമീടോമോ ഫോറസ്ട്രിയുമായി ചേര്‍ന്ന് ക്യോത്തോ സര്‍വകലാശയിലെ ഗവേഷകരാണ് ലിഗ്നോസാറ്റ് എന്ന ലോകത്തെ ആദ്യ വുഡന്‍ സാറ്റ്‌ലൈറ്റ് നിര്‍മിച്ചത്. അന്താരാഷ്ട്ര ബഹിരാകാശ നിലയത്തിലേക്കുള്ള സ്പേസ് എക്‌സിന്‍റെ ദൗത്യത്തിനൊപ്പം വിക്ഷേപിച്ച ലിഗ്നോസാറ്റ് പിന്നാലെ ഭൂമിയില്‍ നിന്ന് 400 കിലോമീറ്റര്‍ ഉയരത്തിലുള്ള ഭ്രമണപഥത്തിലെത്തിച്ചേര്‍ന്നു.
‘1900ങ്ങളുടെ തുടക്കത്തില്‍ വിമാനങ്ങള്‍ തടികള്‍ ഉപയോഗിച്ച് നിര്‍മിച്ചിരുന്നു. അതിനാല്‍ വുഡന്‍ സാറ്റ്‌ലൈറ്റും പ്രായോഗികമാണ്. ഭൂമിയിലേക്കാള്‍ കൂടുതല്‍ മരക്കഷണങ്ങള്‍ക്ക് ബഹിരാകാശത്ത് ആയുസുണ്ടാകും. ബഹിരാകാശത്ത് വെള്ളവും ഓക്സിജനും ഇല്ലാത്തതിനാല്‍ അഴുകാത്തതും കത്താത്തതുമാണ് ഇതിന് കാരണം’ എന്നും ക്യോത്തോ സര്‍വകലാശയിലെ ഫോറസ്റ്റ് സയന്‍സ് വിഭാഗം പ്രൊഫസറായ കോജി മുറാത്ത അഭിപ്രായപ്പെട്ടു. മരം കൊണ്ടുള്ള കൃത്രിമ ഉപഗ്രഹങ്ങള്‍ പാരിസ്ഥിതിക ആഘാതം കുറയ്ക്കാനും സഹായിക്കും എന്ന് കരുതുന്നു.
ലിഗ്നോസാറ്റ് ആറ് മാസക്കാലം ഭൂമിയെ ഭ്രമണം ചെയ്യും. -100 മുതല്‍ 100 ഡിഗ്രിസെല്‍ഷ്യസ് വരെ വ്യതിചലിക്കുന്ന ബഹിരാകാശ കാലാവസ്ഥയെ ഈ വുഡന്‍ കൃത്രിമ ഉപഗ്രഹം എങ്ങനെ അതിജീവിക്കുമെന്ന് ഉറ്റുനോക്കുകയാണ് ലോകം.
