കഴിഞ്ഞ ഒരു വര്‍ഷത്തിനുള്ളില്‍ നാലു ലക്ഷത്തിലേറെ ഇന്ത്യൻ വിനോദ സഞ്ചാരികൾ ഓസ്‌ട്രേലിയയിലെത്തിയതെന്ന് കണക്കുകൾ. ഇക്കഴിഞ്ഞ ജനുവരിയില്‍ മാത്രം 26,200 ഇന്ത്യക്കാരാണ് ഓസ്‌ട്രേലിയയിലേക്ക് വിനോദ സഞ്ചാരികളായെത്തിയതെന്ന് ടൂറിസം ഓസ്ട്രേലിയ അറിയിച്ചു. 2019 ല്‍ ഓസ്‌ട്രേലിയയിലേക്ക് ഏറ്റവും കൂടുതല്‍ സഞ്ചാരികളെത്തുന്ന രാജ്യങ്ങളുടെ പട്ടികയില്‍ ഒമ്പതാം സ്ഥാനത്തായിരുന്ന ഇന്ത്യ ഇപ്പോൾ 5-ാം സ്ഥാനത്താണ്.
വീസ അപേക്ഷ നല്‍കുന്നതും അനുവദിക്കുന്നതുമെല്ലാം കൂടുതല്‍ വേഗത്തിലും അനായാസവുമാക്കിയതും യാത്രികരെ ആകര്‍ഷിച്ചു. കൂടാതെ ഇന്ത്യയിലെ പ്രധാന നഗരങ്ങളായ ന്യൂഡല്‍ഹി, ബെംഗളൂരു, മുംബൈ എന്നിവിടങ്ങളില്‍ നിന്നും ഓസ്‌ട്രേലിയയിലേക്ക് ഇപ്പോള്‍ പ്രതിവാരം 28 വിമാനങ്ങളുണ്ട്. 2019 ല്‍ ഇത് വെറും എട്ടു വിമാന സര്‍വീസുകളായിരുന്നു. ഇതും ഇന്ത്യക്കാരെ വിനോദ സഞ്ചാരത്തിനായി ഓസ്ട്രേലിയ തെരഞ്ഞെടുക്കുന്നതിൽ സഹായിച്ചു.
