പാരീസ്: ക്ലബ് കരിയറില്‍ 700 ഗോള്‍ തികച്ച് ലിയോണല്‍ മെസി. ബാഴ്സലോണയ്ക്കായി 672 ഉം പിഎസ്ജിക്കായി 28ഉം ഗോളാണ് മെസി നേടിയത്. യൂറോപ്യന്‍ ഫുട്‌ബോളില്‍ 700 ഗോള്‍ തികയ്ക്കുന്ന രണ്ടാമത്തെ താരമാണ് മെസി. യൂറോപ്യന്‍ ഫുട്‌ബോളില്‍ 701 ഗോള്‍ നേടിയ ക്രിസ്റ്റ്യാനോ റൊണാള്‍ഡോയുടെ റെക്കോര്‍ഡിനും ഇനി അധികകാലം ആയുസുണ്ടാകില്ല. ഈ വര്‍ഷം പിഎസ്ജിക്കായി എട്ട് മത്സരങ്ങളില്‍ നാല് ഗോളുകളാണ് മെസിയുടെ സമ്പാദ്യം.
മെസി- എംബാപ്പെ സഖ്യം ഗോള്‍ നേടിയപ്പോള്‍ മാഴ്സയെ എതിരില്ലാത്ത് മൂന്ന് ഗോളിനാണ് പിഎസ്ജി തോല്‍പ്പിച്ചത്. ഇതില്‍ രണ്ട് ഗോള്‍ എംബാപ്പെയുടെ വകയായിരുന്നു. ഒരു ഗോള്‍ മെസിയുടെയും. 25-ാം മിനുട്ടിലായിരുന്നു എംബാപ്പെയുടെ ആദ്യ ഗോള്‍. ഗോളിന് വഴിയൊരുക്കിയത് മെസിയും. 29-ാം മിനുട്ടില്‍ മെസിയുടെ ഗോള്‍. ഇത്തവണ എംബാപ്പെ അസിസ്റ്റ് നല്‍കി. ആദ്യ പകുതി 2-0ത്തിന് അവസാനിച്ചു. രണ്ടാം പകുതിയില്‍ 55-ാം മിനുട്ടിലായിരുന്നു പിഎസ്ജിയുടെ മൂന്നാമത്തെ ഗോള്‍. ഇത്തവണയും മെസിയാണ് ഗോളിന് വഴിയൊരുക്കിയത്.ലീഗില്‍ പിഎസ്ജി ഒന്നാമത് തുടരുന്നു. 25 മത്സരങ്ങളില്‍ 60 പോയിന്റാണ് പിഎസ്ജിക്ക്. ഇത്രയും മത്സരങ്ങളില്‍ 52 പോയിന്റുള്ള മാഴ്സെ രണ്ടാം സ്ഥാനത്താണ്.
