കൊച്ചി: സ്ത്രീധനത്തിന്‍റെ പേരിൽ എറണാകുളം വടക്കൻ പറവൂർ സ്വദേശിയായ നവവധുവിനെ ഭർത്താവ് ക്രൂരമായി മർദ്ദിച്ച സംഭവത്തിൽ ഭര്‍ത്താവിനും കുടുംബത്തിനുമെതിരെ പരാതിക്കാരിയുടെ അച്ഛൻ. മകളുടെ കഴുത്തിൽ മൊബൈൽ ചാര്‍ജര്‍ കേബിൾ കൊണ്ട് മുറുക്കി കൊലപ്പെടുത്താൻ ശ്രമിച്ചെന്നും അതിക്രൂരമായി മര്‍ദ്ദിച്ചെന്നും യുവതിയുടെ അച്ഛൻ പറഞ്ഞു. കോഴിക്കോട് പന്തീരാങ്കാവ് സ്വദേശിയായ രാഹുലിനും കുടുംബത്തിനുമെതിരെയാണ് പരാതി. വിവാഹം കഴിഞ്ഞ് ഏഴാം നാൾ തന്നെ കാണാനെത്തിയ വീട്ടുകാരോടാണ് പീഡനവിവരം യുവതി തുറന്ന് പറഞ്ഞത്. ഭർത്താവിനെതിരെ ഗാർഹികപീഡനത്തിന് കേസെടുത്ത പന്തീരാങ്കാവ് പൊലീസ് നടപടിയെടുക്കാൻ വൈകിയെന്നും കുടുംബം ആരോപിച്ചു.
മെയ് അഞ്ചിനായിരുന്നു ജർമ്മനിയിൽ എയർനോട്ടിക്കൽ എഞ്ചിനിയറായ രാഹുലിന്‍റെയും വടക്കൻ പറവൂര്‍ സ്വദേശിയായ യുവതിയുടെയും വിവാഹം. വിവാഹ ശേഷം ഇവര്‍ കോഴിക്കോടേക്ക് പോയി. എഴാം നാൾ വീടുകാണൽ ചടങ്ങിനായാണ് പരാതിക്കാരിയുടെ കുടുംബം കോഴിക്കോട്ടെ വീട്ടിലെത്തിയത്. ഇവിടെ ആചാരപ്രകാരം എത്തിച്ച സാധനങ്ങൾ ഇറക്കിവെച്ച സമയത്തൊന്നും നവവധു ആ ഭാഗത്തേക്ക് വന്നില്ല. പിന്നീട് രാഹുലിന്റെ അമ്മ മകൾ വസ്ത്രം മാറുകയാണെന്ന് പറഞ്ഞ് ഒഴിയുകയായിരുന്നു.
പിന്നീട് മകൾ വന്നപ്പോൾ മുഖം ഷാൾ കൊണ്ട് മറച്ചിരുന്നതാണ് അച്ഛൻ്റെയും വീട്ടുകാരുടെയും സംശയത്തിന് ഇടയാക്കിയത്. മകളെ അടുത്തിരിത്തി ചോദിച്ചപ്പോൾ സംസാരിക്കാൻ പോലും കഴിയാത്ത നിലയിലായിരുന്നു. ഭര്‍ത്താവിന്റെ അമ്മ യുവതി വീണ് പരിക്കേറ്റതാണെന്ന് പറഞ്ഞപ്പോൾ യുവതിയുടെ ബന്ധുക്കൾ വിശ്വസിച്ചില്ല. ആവര്‍ത്തിച്ച് ചോദിച്ചപ്പോഴാണ് യുവതി കാര്യം തുറന്നുപറഞ്ഞത്. ആദ്യ ദിവസം മുതൽ തന്നെ സ്ത്രീധനം കുറഞ്ഞ് പോയെന്ന വീട്ടുകാരുടെയും ഭർത്താവിന്‍റെയും കുത്തുവാക്കുകൾ ഉണ്ടായിരുന്നെന്നും ദിവസങ്ങൾക്കുള്ളിൽ തന്നെ യുവതിയെ പലതും പറഞ്ഞ് സംശയിച്ച് ഇകഴ്ത്താനുള്ള ശ്രമങ്ങളും നടന്നുവെന്നുമാണ് ആരോപണം. ശനിയാഴ്ച പുലർച്ചെയാണ് യുവതിയെ രാഹുൽ ക്രൂരമായി മർദ്ദിച്ച് അവശയാക്കിയത്. ലഹരിക്ക് അടിമയാണ് രാഹുലെന്നും വധശ്രമത്തിന് അടക്കം കേസെടുക്കണമെന്നാണ് കുടുംബത്തിന്‍റെ ആവശ്യം.
എം.ടെക് ബിരുദധാരിയാണ് പരാതിക്കാരി. ഇവര്‍ സ്വകാര്യ കമ്പനിയിൽ ഉയർന്ന ഉദ്യോഗസ്ഥയാണ്. വിവരമറിഞ്ഞ കുടുംബം യുവതിയുമായി ഉടൻ പന്തീരാങ്കാവ് പൊലീസിനെ സമീപിച്ചെങ്കിലും പൊലീസ് നടപടി വൈകിപ്പിച്ചതായി അച്ഛൻ ആരോപിച്ചു. പൊലീസിനെ കണ്ട ശേഷം യുവതിയെയും കൂട്ടി കുടുംബം തിരികെ എറണാകുളത്തേക്ക് മടങ്ങുകയായിരുന്നു. മുഖ്യമന്ത്രിക്ക് പരാതി നൽകി നിയമനടപടിയുമായി മുന്നോട്ട് പോകാനാണ് യുവതിയുടെ തീരുമാനം. പരാതിക്കാരിയായ യുവതി മാനസികമായി തകര്‍ന്ന നിലയിലാണെന്നും അച്ഛൻ പറഞ്ഞു.
