സിഡ്നി: നോവലിൽ പീഡോഫീലിയെക്കുറിച്ച് പ്രതിപാദിക്കുന്നുവെന്ന ആരോപണത്തെ തുടർന്ന് ഓസ്ട്രേലിയൻ എഴുത്തുകാരി അറസ്റ്റിൽ. ടോറിവുഡ്‌സ് എന്ന തൂലികാനാമത്തിൽ എഴുതുന്ന ഓസ്ട്രേലിയൻ എഴുത്തുകാരി ലോറൻ ടെസോലിൻ മസ്ട്രോസയാണ് വായനക്കാരുടെ ആരോപണത്തെ തുടർന്ന് അറസ്റ്റിലായത്.
ടെസോലിന്റെ ‘ഡാഡീസ് ലിറ്റിൽ ടോയ്’ എന്ന പേരിലുള്ള പുസ്‌തകത്തിൽ കുട്ടികളെ ലൈംഗികമായി ദുരുപയോഗം ചെയ്യുന്ന തരത്തിലുള്ള ഉള്ളടക്കമുണ്ടെന്ന് ആരോപണം ഉയർന്നിരുന്നു. സംഭവം വിവാദമാകുകയും പുസ്‌തകത്തേക്കുറിച്ച് ന്യൂ സൗത്ത് വേൽസ് പൊലീസിന് നിരവധി പരാതികൾ ലഭിക്കുകയും ചെയ്ത സാഹചര്യത്തിലാണ് അറസ്റ്റ്. ഇക്കഴിഞ്ഞ വെള്ളിയാഴ്‌ച സിഡ്‌നിക്ക് സമീപത്തെ ക്വാക്കേഴ്‌സ് ഹില്ലിലെ വീട്ടിൽ നിന്നാണ് ടെസോലിനെ അറസ്റ്റ് ചെയ്തത്.
18 വയസുകാരിയും അവളുടെ പിതാവിൻ്റെ സുഹൃത്തും തമ്മിലുള്ള ബന്ധമാണ് ഇറോട്ടിക് ഫിക്ഷൻ നോവലായ ‘ഡാഡീസ് ലിറ്റിൽ ടോയി’യിൽ പ്രതിപാദിക്കുന്നത്. പെൺകുട്ടിക്ക് മൂന്ന് വയസ് പ്രായമുള്ളപ്പോൾ മുതൽ അവളോട് തനിക്കുണ്ടാകുന്ന താൽപര്യത്തേക്കുറിച്ച് പുസ്‌തകത്തിലെ ആൺകഥാപാത്രം സംസാരിക്കുന്നത് നോവലിലുണ്ട്. ഇത് സോഷ്യൽ മീഡിയയിൽ വലിയ തോതിൽ വിമർശനങ്ങൾക്ക് ഇടയാക്കിയിരുന്നു.
33 കാരിയായ ലോറൻ ടെസോലിൻ മസ്ട്രോസ ക്രിസ്‌ത്യൻ ചാരിറ്റി മാർക്കറ്റിങ് എക്‌സിക്യൂട്ടിവ് കൂടിയാണ്. അറസ്റ്റ് ചെയ്യപ്പെട്ട് ജാമ്യത്തിലിറങ്ങിയ എഴുത്തുകാരി തൻ്റെ ലിങ്ക്‌ഡ്ഇൻ, സോഷ്യൽമീഡിയ അക്കൗണ്ടുകൾ ഡീ ആക്ട‌ിവേറ്റ് ചെയ്തു. വിവാദമായ പുസ്‌തകം ആമസോൺ, ഗുഡ്‌റീഡ്‌സ് എന്നി വെബ്സൈറ്റുകളിൽ നിന്ന് പിൻവലിക്കുകയും ചെയ്തു.
