ചെന്നൈ: രാജ്യമൊട്ടാകെ ആകാംക്ഷയോടെ കാത്തിരിക്കുന്ന ഒരു ചിത്രമാണ് കങ്കുവ. നീണ്ട കാലത്തെ പ്രയ്‍തനങ്ങള്‍ക്ക് ഒടുവില്‍ ചിത്രം പ്രദര്‍ശനത്തിന് എത്തുകയാണ്. കഴിഞ്ഞ ദിവസം ചിത്രത്തിന്‍റെ പുതിയ ട്രെയിലര്‍ പുറത്തിറങ്ങി. പ്രേക്ഷക തിയറികളെ അസ്ഥാനത്താക്കുന്ന രീതിയിലാണ് പുതിയ ട്രെയിലര്‍ എത്തിയിരിക്കുന്നത്. ശിവ സംവിധാനം ചെയ്യുന്ന ചിത്രം ഗ്രീന്‍ സ്റ്റുഡിയോസാണ് നിര്‍മ്മിക്കുന്നത്.
കങ്കുവയായി സൂര്യ എത്തുന്ന ചിത്രത്തില്‍ താരങ്ങളായി ദിഷാ പപഠാണി, റെഡ്ഡിൻ കിംഗ്‍സലെ, നടരാജൻ സുബ്രഹ്‍മണ്ം, കൊവൈ സരള, വത്‍സൻ ചക്രവര്‍ത്തി, ആനന്ദരാജ്, ടി എം കാര്‍ത്തിക്, ജി മാരിമുത്ത്, ദീപ വെങ്കട്, ബാല ശറവണൻ, രവി രാഘവൻ, കെ എസ് രവികുമാര്, ഷാജി ചെൻ, ബി എസ് അവിനാശ്, അഴകം പെരുമാള്‍, പ്രേം കുമാര്‍, കരുണാസ് തുടങ്ങിയവര്‍ ഉണ്ടാകും. വമ്പൻ ക്യാൻവാസിലാണ് ചിത്രം എത്തുക. വെട്രി പളനിസ്വാമിയാണ് ഛായാഗ്രാഹണം. ദേവി ശ്രീ പ്രസാദാണ് സംഗീതം.
ഇതുവരെ കാണിച്ച പിരീയിഡ് രംഗങ്ങള്‍ക്ക് അപ്പുറം പുതിയ കാലത്തും കഥയുടെ വലിയൊരു ഭാഗം നടക്കുന്നു എന്നാണ് പുതിയ ട്രെയിലര്‍ വ്യക്തമാക്കുന്നത്. ഗംഭീര ദൃശ്യങ്ങളാണ് ശിവ ഒരുക്കിയത് എന്ന് വ്യക്തമാണ്. ട്രെയിലറിന്‍റെ അവസാനം കാണിക്കുന്ന പല്ലുകളും, ചിരിയും കാര്‍ത്തിയുടെതാണ് എന്ന തരത്തില്‍ ഇതിനകം അഭ്യൂഹങ്ങള്‍ പരക്കുന്നുണ്ട്.
