മെൽബൺ : വിപഞ്ചിക ഗ്രന്ഥശാല മെൽബണിൻ്റെ ആഭിമുഖ്യത്തിൽ ഓസ്ട്രേലിയയിൽ ലിറ്ററേച്ചർ ഫെസ്റ്റിവെലിന് തുടക്കം കുറിക്കുന്നു. മലയാള ഭാഷയേയും, സാഹിത്യത്തെയും ചേർത്തു പിടിക്കുന്ന AMLF 2024 (ഓസ്ട്രേലിയൻ മലയാളി ലിറ്ററേച്ചർ ഫെസ്റ്റിവൽ) വരുന്ന ഡിസംബർ 14 ന് ശനിയാഴ്ച വൈകിട്ട് 4pm മുതൽ 9pm വരെ നോട്ടിങ് ഹിൽ കമ്മ്യൂണിറ്റി ഹാളിൽ വെച്ചു വിവിധ പരിപാടികളോടെ നടത്തുന്നതായിരിക്കുമെന്ന് ഭാരവാഹികൾ അറിയിച്ചു.
Address :
Notting Hill Community Hall
386 Ferntree Gully Road,Notting Hill, VIC 3168
ലിറ്ററേച്ചർ ഫെസ്റ്റിവലിന് ആശംസകൾ അറിയിച്ച് മലയാളികളുടെ പ്രിയ എഴുത്തുകാരൻ എസ് ഹരീഷ്. എഴുത്തുകാരെയും പുസ്തകങ്ങളെയും അടുത്തറിയുവാനും വായനയെന്ന ലഹരിയെ പ്രോത്സാഹിപ്പിക്കുവാനുമുള്ള ലിറ്ററേച്ചർ ഫെസ്റ്റിവൽ പോലെയുള്ള സാഹചര്യങ്ങൾ ഒരിക്കലും പാഴാക്കരുത് എന്ന് എസ് ഹരീഷ് അഭിപ്രായപ്പെട്ടു.
കോട്ടയം ജില്ലയിലെ നീണ്ടൂരിൽ ജനിച്ച അദ്ദേഹത്തിന്റെ രസവിദ്യയുടെ ചരിത്രം എന്ന ആദ്യ കഥാസമാഹാരത്തിനാണ് കേരളസാഹിത്യ അക്കാദമിയുടെ ഗീതാഹിരണ്യൻ എൻഡോവ്‌മെന്റ് ലഭിച്ചത്.തോമസ് മുണ്ടശ്ശേരി കഥാപുരസ്‌കാരം, വി.പി. ശിവകുമാർ സ്മാരക കഥാപുരസ്‌കാരം എന്നിവ നേടിയിട്ടുള്ള അദ്ദേഹത്തിന് 2016-ലെ കേരളസാഹിത്യ അക്കാദമി അവാർഡ് ആദം എന്ന കഥാസമാഹാരത്തിനു ലഭിച്ചു. മീശയ്ക്ക് കേരളസാഹിത്യ അക്കാദമി അവാർഡും ഇംഗ്ലിഷ് പരിഭാഷയ്ക്ക് (Moustache) 2020-ലെ ജെസിബി അവാർഡും 2022-ലെ വയലാർ അവാർഡും ലഭിച്ചു. ഏദൻ, ജല്ലിക്കട്ട്, ചുരുളി, നൻപകൽ നേരത്ത് മയക്കം എന്നീ സിനിമകളുടെ തിരക്കഥാകൃത്ത് കൂടിയാണ് നമ്മുടെ പ്രിയപ്പെട്ട എഴുത്തുകാരൻ എസ് ഹരീഷ്.
