യുഎസിലെ ന്യൂ മെക്‌സിക്കോയില്‍ ‘ഹോട്ട് ഡോഗില്‍’ കൊക്കെയ്ന്‍ കണ്ടെത്തി. റെസ്റ്റോറന്റില്‍ നിന്ന് വാങ്ങിയ ഹോട്ട് ഡോഗിനുള്ളില്‍ ചെറിയ പ്ലാസ്റ്റിക് ബാഗില്‍ ഒളിപ്പിച്ച നിലയിലായിരുന്നു കൊക്കെയ്ന്‍.ഉപഭോക്താവിന്റെ പരാതിയില്‍ റസ്റ്റോറന്റ് ജീവനക്കാരനെ പൊലീസ് അറസ്റ്റ് ചെയ്തു.
ന്യൂയോര്‍ക്ക് പോസ്റ്റ് റിപ്പോര്‍ട്ട് പ്രകാരം സോണിക് ഡ്രൈവ്‌ഇന്‍ റസ്റ്റോറന്റില്‍ ജോലി ചെയ്യുന്ന ജെഫ്രി ഡേവിഡ് സലാസര്‍ (54) എന്നയാളെയാണ് എസ്പനോള പൊലീസ് അറസ്റ്റ് ചെയ്തത്. ഇയാളുടെ കൈയില്‍ നിന്ന് അബദ്ധത്തില്‍ നഷ്ടപ്പെട്ട കൊക്കെയ്ന്‍ പൊതി ഭക്ഷണം വാങ്ങാനെത്തിയ സ്ത്രീയുടെ ഹോട്ട് ഡോഗിനുള്ളില്‍ വീഴുകയായിരുന്നു. അശ്രദ്ധമായി ഭക്ഷണം തയ്യാറാക്കുന്നതിനിടെയാണ് കൊക്കെയ്ന്‍ ഭക്ഷണത്തില്‍ വീണത്.
ഭക്ഷണം വാങ്ങി വീട്ടില്‍ തിരിച്ചെത്തിയ യുവതി ഹോട്ട് ഡോഗ് കഴിക്കുന്നതിനിടെയാണ് കൊക്കെയ്ന്‍ കണ്ടെത്തിയത്. തുടര്‍ന്ന് പൊലീസില്‍ പരാതി നല്‍കുകയായിരുന്നു. റെസ്റ്റോറന്റിന്റെ പാര്‍ക്കിംഗ് ലോട്ടില്‍ നിന്നുമാണ് തനിക്ക് കൊക്കെയ്ന്‍ ലഭിച്ചതെന്ന് സലാസര്‍ പൊലീസിനോട് സമ്മതിച്ചതായി റിപ്പോര്‍ട്ടില്‍ പറയുന്നു.
