സിഡ്നി: സമൂഹമാധ്യമങ്ങൾ ഉപയോഗിക്കുന്നതിന് കുട്ടികൾക്ക് കുറഞ്ഞ പ്രായപരിധി നിശ്ചയിക്കാൻ ഒരുങ്ങി ഓസ്‌ട്രേലിയ. മാനസികവും ശാരീരികവുമായ ആരോഗ്യത്തെക്കുറിച്ചുള്ള ആശങ്കകൾ ചൂണ്ടിക്കാട്ടിയാണ് തീരുമാനം. സമൂഹമാധ്യമങ്ങൾ സമൂഹത്തിൽ ചെലുത്തുന്ന സ്വാധീനങ്ങളെക്കുറിച്ചുള്ള പാർലമെന്‍ററി അന്വേഷണത്തിന്‍റെ പശ്ചാത്തലത്തിലാണ് അൽബാനീസ് പ്രായ നിയന്ത്രണ പദ്ധതി പ്രഖ്യാപിച്ചത്. നിയമം പ്രാബല്യത്തിൽ വന്നാൽ സാമൂഹ്യ മാധ്യമത്തിൽ പ്രായ നിയന്ത്രണം ഏർപ്പെടുത്തുന്ന ലോകത്തിലെ ആദ്യത്തെ രാജ്യങ്ങളുടെ പട്ടികയിൽ ഓസ്‌ട്രേലിയ എത്തും.
കുറഞ്ഞ പ്രായം എത്രയെന്ന് വ്യക്തമാക്കിയിട്ടില്ലെങ്കിലും അത് 14നും 16നും ഇടയിലായിരിക്കുമെന്നാണ് റിപ്പോർട്ട്. പ്രായപരിധി നിയമങ്ങൾ അവതരിപ്പിക്കുന്നതിന് മുമ്പ് സർക്കാർ പ്രായം സ്ഥിരീകരണ ട്രയൽ നടത്തുമെന്ന് പ്രധാനമന്ത്രി ആന്‍റണി അൽബാനീസ് പറഞ്ഞു. കുട്ടികളെ ഇലക്ട്രോണിക് ഉപകരണങ്ങളിൽ നിന്ന് ഒഴിവാക്കി മൈതാനങ്ങളിലും നീന്തൽക്കുളങ്ങളിലും ടെന്നീസ് കോർട്ടുകളിലും കാണാൻ താൻ ആഗ്രഹിക്കുന്നതായി അൽബാനീസ് പറഞ്ഞു.
