ഷാരൂഖ് ഖാന്‍, ദീപിക പദുകോണ്‍ എന്നിവരെ കേന്ദ്ര കഥാപാത്രങ്ങളാക്കി സിദ്ധാര്‍ഥ് ആനന്ദ് സംവിധാനം ചെയ്‍ത ‘പത്താ’ന്‍റെ സെന്‍സറിംഗ് പൂര്‍ത്തിയായി. ആകെ 10 കട്ടുകളാണ് സിബിഎഫ്സി നിര്‍ദേശിച്ചിരുന്നത്. ഈ കട്ടുകളോടെ ചിത്രത്തിന് യു/ എ സര്‍ട്ടിഫിക്കറ്റ് ലഭിച്ചു. സിബിഎഫ്സി നിര്‍ദേശിച്ച കട്ടുകള്‍ക്ക് ശേഷം ചിത്രത്തിന്റെ ആകെ ദൈര്‍ഘ്യം 146 മിനിറ്റ് (2 മണിക്കൂര്‍ 26 മിനിറ്റ്) ആണ്.
സിബിഎഫ്സിയുടെ പരിശോധനാ കമ്മിറ്റി നിര്‍ദേശിച്ച കട്ടുകളില്‍ ഏറിയ പങ്കും സംഭാഷണങ്ങള്‍ ആണെന്ന് ബോളിവുഡ് ഹംഗാമ റിപ്പോര്‍ട്ട് ചെയ്യുന്നു. ‘റോ’ (റിസര്‍ട്ട് ആന്‍ഡ് അനാലിസിസ് വിംഗ്) എന്ന വാക്കിനു പകരം സന്ദര്‍ഭത്തിനനുസരിച്ച് ‘ഹമാരെ’ എന്നാക്കിയിട്ടുണ്ട്. ‘പിഎംഒ’ (പ്രൈം മിനിസ്റ്റേഴ്സ് ഓഫീസ്) എന്ന വാക്ക് 13 ഇടങ്ങളില്‍ നിന്ന് ഒഴിവാക്കി. ‘പിഎം’ (പ്രധാനമന്ത്രി) എന്ന വാക്കിനുപകരം ‘പ്രസിഡന്‍റ്’ എന്നോ ‘മിനിസ്റ്റര്‍’ എന്നോ മാറ്റിയിട്ടുണ്ട്. ‘അശോക് ചക്ര’ എന്നതിനു പകരം ‘വീര്‍’ പുരസ്കാര്‍ എന്നും ‘എക്സ്- കെജിബി’ എന്നതിനു പകരം ‘എക്സ് എസ്ബിയു’ എന്നും മാറ്റി. ‘മിസിസ് ഭാരത് മാത’ എന്നതിനു പകരം ‘ഹമാരി ഭാരത് മാത’ എന്നാക്കി. മറ്റൊരു സംഭാഷണത്തില്‍ ‘സ്കോച്ച്’ എന്നതിനു പകരം ‘ഡ്രിങ്ക്’ എന്നാക്കി. ‘ബ്ലാക്ക് പ്രിസണ്‍ റഷ്യ’ എന്നതില്‍ നിന്നും ‘റഷ്യ’ എന്ന വാക്ക് നീക്കി.
സംഭാഷണങ്ങള്‍ കൂടാതെ മൂന്ന് ഷോട്ടുകൾ നീക്കാനും സിബിഎഫ്സി ആവശ്യപ്പെട്ടിരുന്നുവെന്ന് ബോളിവുഡ് ഹംഗാമയുടെ റിപ്പോര്‍ട്ടില്‍ ഉണ്ട്. വിവാദമായ ‘ബേഷരം റംഗ്’എന്ന ഗാനത്തിലേതാണ് ഈ മൂന്ന് ഷോട്ടുകളും. നിതംബത്തിന്‍റെ ക്ലോസപ്പ് ഷോട്ട്, വശത്തുനിന്നുള്ള ഷോട്ട് (ഭാഗികമായ നഗ്നത) എന്നിവയ്ക്കൊപ്പം ഗാനത്തില്‍ ബഹുത് ടംഗ് കിയാ എന്ന വരികള്‍ വരുമ്പോഴത്തെ നൃത്ത ചലനവും ഒഴിവാക്കാന്‍ സിബിഎഫ്സി ആവശ്യപ്പെട്ടിരുന്നു. എന്നാല്‍ നീക്കേണ്ട ഷോട്ടുകളുടെ സമയദൈര്‍ഘ്യം എത്രയെന്ന് ബോര്‍ഡ് അറിയിച്ചിരുന്നില്ല.
നാല് വര്‍ഷത്തെ ഇടവേളയ്ക്കു ശേഷം ഷാരൂഖ് ഖാന്‍ നായകനാവുന്ന പത്താൻ ജനുവരി 25-ന് തിയറ്ററുകളില്‍ എത്തും. ആക്ഷന്‍ ത്രില്ലര്‍ വിഭാഗത്തില്‍ പെടുന്നതാണ് ചിത്രം. ജോണ്‍ എബ്രഹാം, ഡിംപിള്‍ കപാഡിയ, ഷാജി ചൗധരി, ഗൗതം, അഷുതോഷ് റാണ തുടങ്ങിയവരും ചിത്രത്തിന്റെ ഭാഗമാണ്.
Story Highlights: CBFC issued U/A certificate to the Pathaan
