മെക്‌സിക്കോ: മോതിര വൃത്തത്തില്‍ ചുവന്ന് തുടുത്ത് സൂര്യൻ. ചന്ദ്രന്റെ നിഴല്‍ അഞ്ച് മിനിറ്റോളം സൂര്യനെ മറച്ചപ്പോള്‍ അപൂർവ്വമായ ആകാശ ദൃശ്യവിരുന്ന് ഭൂമിയില്‍ നിന്ന് കണ്ട് ആസ്വദിച്ചത് ആയിരങ്ങള്‍
അരനൂറ്റാണ്ടിനിടയിലെ ഏറ്റവും ദൈർഘ്യമേറിയ സൂര്യഗ്രഹണം കാണാൻ വലിയ ജനപ്രവാഹമാണ് ദൃശ്യമായത്. വടക്കേ അമേരിക്കയിലാണ് സൂര്യഗ്രഹണം ദൃശ്യമായത്. കാനഡയിലും മെക്‌സിക്കോയിലും ടെക്‌സസിലും ഉള്‍പ്പെടെ അപൂർവ്വ ആകാശ ദൃശ്യവിരുന്ന് കാണാൻ ജനങ്ങള്‍ ഒഴുകിയെത്തി.
ഇന്ത്യയില്‍ ഇക്കുറി ഇത് ദൃശ്യമാകില്ല. മെക്‌സിക്കോയിലാണ് സമ്ബൂർണ സൂര്യഗ്രഹണം ഏറെക്കുറെ പൂർണമായി ദൃശ്യമായത്. പ്രാദേശിക സമയം ഉച്ചയ്‌ക്ക് രണ്ട് മണിയോടെയാണ് മെക്‌സിക്കോയുടെ പസഫിക് തീരത്ത് ഈ പ്രതിഭാസം ദൃശ്യമായത്. ചന്ദ്രൻ ഏതാണ്ട് നാലര മിനിറ്റോളം സൂര്യനെ പൂർണമായി മറച്ചതായി ബിബിസി റിപ്പോർട്ട് ചെയ്തു.
സൂര്യനെ പൂർണമായി മറച്ചുകൊണ്ട് ചന്ദ്രൻ ഭൂമിക്കും സൂര്യനും ഇടയിലൂടെ കടന്നുപോകുന്ന പ്രതിഭാസമാണിത്. അപൂർവ്വ ദൃശ്യവിരുന്ന് കാണാൻ പല സ്ഥലങ്ങളിലും ജനങ്ങള്‍ തുറസ്സായ സ്ഥലങ്ങളിലേക്ക് കൂട്ടമായി എത്തുന്നത് കാണാമായിരുന്നു. ചന്ദ്രന്റെ നിഴല്‍ പൂർണമായി മറച്ചപ്പോള്‍ ചുവന്ന മോതിരവട്ടമായി സൂര്യൻ മാറുന്നതിന്റെ ദൃശ്യങ്ങള്‍ നാസ പുറത്തുവിട്ടു. എല്ലായിടത്തും കാണാൻ കഴിയാത്തതിനാല്‍ നാസയുടെ യൂട്യൂബ് ചാനലില്‍ സൂര്യഗ്രഹണത്തിന്റെ തത്സമയ സംപ്രേഷണവും ഒരുക്കിയിരുന്നു.
2026 ഓഗസ്റ്റിലാണ് അടുത്ത സമ്ബൂർണ ഗ്രഹണം ദൃശ്യമാകുക. ഇന്ത്യയില്‍ ഇനി 2031 ല്‍ മാത്രമാകും സമ്ബൂർണ ഗ്രഹണം കാണാനാകുക.
