ലണ്ടൻ: ബ്രിട്ടന്റെ സിറോ എമിഷൻ കാര്‍ പോളിസിയില്‍ നിര്‍ണായക മാറ്റം വരുത്തി പ്രധാനമന്ത്രി ഋഷി സുനക്. ഡീസല്‍ -പെട്രോള്‍ കാറുകളുടെ വില്‍പന നിരോധനം 2030 നിന്നും അഞ്ച് വര്‍ഷത്തേക്ക് നീട്ടി.
കൂടാതെ വീടുകളില്‍ ഇലക്‌ട്രിക് ഹീറ്റിങ് സംവിധാനം സ്ഥാപിക്കാനുള്ള ഇൻസെന്റീവ് 50 ശതമാനം വര്‍ധിപ്പിച്ചു. നിലവില്‍ 5000 പൗണ്ടായിരുന്നു ഇത് 7,500 പൗണ്ടായി വര്‍ധിപ്പിച്ചു.
2050ല്‍ ബ്രിട്ടനെ കാര്‍ബണ്‍ ഫ്രീ ഇക്കോണമിയായി മാറ്റാനുള്ള പ്രഖ്യാപിത നയത്തില്‍ ഉറച്ചുനില്‍ക്കുന്നു എന്നാല്‍ സാധരണക്കാരില്‍ അധികചെലവുകള്‍ അടിച്ചേല്‍പ്പിക്കുന്നത് ഒഴിവാക്കി ലക്ഷ്യത്തില്‍ എത്താനുള്ള മാര്‍ഗമാണ് സ്വീകരിക്കുന്നതെന്ന് പ്രധാനമന്ത്രി ഋഷി സുനക് വ്യക്തമാക്കി. എന്നാല്‍ പ്രധാനമന്ത്രിയുടെ നിലപാടിനെതിരെ കടുത്ത വിമര്‍ശനമാണ് പ്രതിപക്ഷ പാര്‍ട്ടികള്‍ ഉയര്‍ത്തുന്നത്. സുനക്കിന്റെ നിലപാട് നിരാശാജനകവും ദിശാബോധമില്ലാത്ത പ്രധാനമന്ത്രിയുടെതുമാണെന്ന് ലേബര്‍ പാര്‍ട്ടി ആരോപിച്ചു.
2035 മുതല്‍ പുതിയ ഗ്യാസ് ബോയിലറുകള്‍ക്ക് ഏര്‍പ്പെടുത്തിയിരുന്ന വില്‍പന നിരോധനം അതേപടി തുടരും. എന്നാല്‍ ഗ്യാസ് ബോയിലറുകള്‍ നിര്‍ബന്ധമായും മാറ്റി സ്ഥാപിക്കണമെന്ന നിബന്ധനയില്‍ നിന്നും പാവപ്പെട്ട കുടുംബങ്ങളെ ഒഴിവാക്കും. വാടകയ്ക്ക് നല്‍കുന്ന എല്ലാ കെട്ടിടങ്ങള്‍ക്കും 2025 മുതല്‍ ഗ്രേഡ് – സി നിലവാരത്തിനു മുകളിലുള്ള എനര്‍ജി പെര്‍ഫോമെൻസ് സര്‍ട്ടിഫിക്കറ്റ് നിര്‍ബന്ധമാക്കുന്ന നിബന്ധനയിലും ഇളവുകള്‍ പ്രഖ്യാപിച്ചിട്ടുണ്ട്.
ജനങ്ങളെ പാപ്പരാക്കി രാജ്യത്തെ രക്ഷിക്കാനില്ലെന്നും അതുകൊണ്ട് നയത്തിലെ മാറ്റം പ്രധാനമാണെന്നും ഹോം സെക്രട്ടറി സുവെല്ല ബ്രേവര്‍മാൻ അടക്കമുള്ള മുതിര്‍ന്ന മന്ത്രിമാര്‍ പ്രതികരിച്ചു. സര്‍ക്കാരിന്റെ നയമാറ്റം ഗ്രാമപ്രദേശങ്ങളിലുള്ളവര്‍ക്ക് ഉപകാരപ്രദമായിരിക്കുമെന്ന് മുൻ പ്രധാനമന്ത്രി ലിസ് ട്രസ് പ്രതികരിച്ചു. നേരത്തെയുള്ള സര്‍ക്കാര്‍ തീരുമാനത്തിന്റെ അടിസ്ഥാനത്തില്‍ ഡീസല്‍- പെട്രോള്‍ കാറുകളുടെ നിര്‍മാണം കുറച്ച്‌ ഇലക്‌ട്രിക് കാറുകളുടെ നിര്‍മാണത്തിലേക്ക് വൻകിട കമ്ബനികള്‍ ചുവടുമാറ്റിയിരുന്നു. ഈ മാറ്റങ്ങള്‍ക്ക് തുരങ്കം വയ്ക്കുന്ന നടപടിയായാണ് സര്‍ക്കാര്‍ തീരുമാനത്തെ കമ്ബനികള്‍ കാണുന്നത്.
