മോഹൻലാലിനെ നായകനാക്കി ഷാജി കൈലാസ് സംവിധാനം ചെയ്യുന്ന ചിത്രം ‘എലോണി’ലെ ഗാനമെത്തി. ‘ലൈഫ് ഈസ് മിസ്ട്രി..’ എന്ന് തുടങ്ങുന്ന ഇംഗ്ലീഷ് ഗാനത്തിന്റെ ലിറിക് വീഡിയോയാണ് റിലീസ് ചെയ്തിരിക്കുന്നത്. 4 മ്യൂസിക്കാണ് സംഗീതം ഒരുക്കിയിരിക്കുന്നത്. ഗാനത്തിന് വരികൾ എഴുതിയിരിക്കുന്നതു പാടിയിരിക്കുന്നതും മൈക്ക് ആണ്.
എലോൺ എന്ന പേര് സൂചിപ്പിക്കുന്നത് പോലെ കഥാപാത്രമായി മോഹൻലാൽ മാത്രം സ്ക്രീനിൽ പ്രത്യക്ഷപ്പെടുന്ന സിനിമയിൽ ശബ്ദ സാന്നിധ്യങ്ങളായി പൃഥ്വിരാജ്, സിദ്ദിഖ്, മഞ്ജു വാര്യർ തുടങ്ങിയവരുമുണ്ട്. 12 വർഷത്തെ ഇടവേളയ്ക്കു ശേഷം ഷാജി കൈലാസിൻറെ സംവിധാനത്തിൽ മോഹൻലാൽ നായകനാവുന്നു എന്നതാണ് ചിത്രത്തിന്റെ പ്രധാന ആകർഷണം.
ആശിർവാദ് സിനിമാസിൻറെ ബാനറിൽ ആൻറണി പെരുമ്പാവൂർ ആണ് നിർമ്മാണം. ആശിർവാദിൻറെ 30-ാം ചിത്രമാണ് എലോൺ. 2000ൽ എത്തിയ ഹിറ്റ് ചിത്രം ‘നരസിംഹ’മായിരുന്നു ആശിർവാദ് സിനിമാസിൻറെ ആദ്യ ചിത്രം. ഷാജി കൈലാസ്-മോഹൻലാൽ കൂട്ടുകെട്ട് തന്നെയായിരുന്നു ചിത്രത്തിലും. 2009ൽ പുറത്തെത്തിയ ക്രൈം ത്രില്ലർ ചിത്രം ‘റെഡ് ചില്ലീസി’നു ശേഷം മോഹൻലാൽ നായകനാവുന്ന ഷാജി കൈലാസ് ചിത്രമാണ് എലോൺ. മുൻപ് ഷാജി കൈലാസിൻറെ ‘ടൈം’, ‘സൗണ്ട് ഓഫ് ബൂട്ട്’, ‘മദിരാശി’, ‘ജിഞ്ചർ’ എന്നീ സിനിമകൾക്ക് രചന നിർവ്വഹിച്ച രാജേഷ് ജയരാമനാണ് പുതിയ ചിത്രത്തിൻ്റേയും തിരക്കഥ ഒരുക്കിയിരിക്കുന്നത്.
story highlights: mohanlal movie alone new song released
