ത്രീഡി സാങ്കേതികവിദ്യയിൽ രാമായണ കഥയെ ആസ്പദമാക്കി ഓം റൗട്ട് ഒരുക്കുന്ന പ്രഭാസ് ചിത്രം ‘ആദിപുരുഷ്’ തിയറ്ററുകളിലെത്താൻ ഇനി 150 ദിവസങ്ങൾ മാത്രം. ആഗോളതലത്തിൽ ജൂൺ 16ന് റിലീസ് ചെയ്യുമെന്ന് അണിയറപ്രവർത്തകർ അറിയിച്ചു. ആരാധകരുടെ ഏറെ നാളത്തെ കാത്തിരിപ്പിനാണ് ഇതോടെ വിരാമമാകുന്നത്.
നേരത്തെ പുറത്തിറങ്ങിയ ടീസറിന് സോഷ്യൽ മീഡിയയിൽ അടക്കം വിമർശനം നേരിട്ടിരുന്നുവെങ്കിലും ത്രിഡി പതിപ്പിന് വലിയ സ്വീകാര്യതയാണ് ലഭിച്ചതെന്ന് ചിത്രത്തിന്റെ അണിയറപ്രവർത്തകർ പറഞ്ഞു. ത്രിഡി ടീസറിന് ലഭിച്ച സ്വീകാര്യത തങ്ങളുടെ ആത്മവിശ്വാസം വർദ്ധിപ്പിച്ചതായും അവർ വ്യക്തമാക്കി. കൃതി സനോനാണ് ചിത്രത്തിലെ നായിക.
ആദിപുരുഷിൽ ശ്രീരാമനായാണ് പ്രഭാസ് എത്തുന്നത്. ചിത്രത്തിൽ രാവണനായി വേഷമിടുന്നത് ബോളിവുഡ് താരം സെയ്ഫ് അലിഖാൻ ആണ്. നടൻ സണ്ണി സിംഗും പ്രധാന വേഷത്തിൽ എത്തുന്നുണ്ട്. ടി- സീരീസ്, റെട്രോഫൈൽ എന്നീ ബാനറുകളിൽ ഭൂഷൺ കുമാറും കൃഷ്ണകുമാറും ഓം റൗട്ടും ചേർന്നാണ് നിർമ്മാണം. തിന്മയ്ക്കുമേൽ നന്മയുടെ വിജയത്തെ ചുറ്റിപ്പറ്റിയുള്ള ഇന്ത്യൻ ഇതിഹാസത്തിന്റെ കഥയാണ് ചിത്രത്തിന്റെ പ്രമേയം.
‘സാഹോ’യ്ക്കും ‘രാധേശ്യാ’മിനും ശേഷം നിർമ്മാതാവായ ഭൂഷൺ കുമാറുമായുള്ള പ്രഭാസിന്റെ മൂന്നാമത്തെ പ്രോജക്ടാണ് ആദിപുരുഷ്. ഹിന്ദിയിലും തെലുങ്കിലുമായാണ് ചിത്രീകരണം. കൂടാതെ, തമിഴ്, മലയാളം എന്നിവയിലും മറ്റു വിദേശഭാഷകളിലേക്കും ഡബ് ചെയ്ത പതിപ്പും റിലീസ് ചെയ്യും. ഛായാഗ്രഹണം – ഭുവൻ ഗൗഡ , സംഗീത സംവിധാനം – രവി ബസ്രുർ . എഡിറ്റിംഗ് – അപൂർവ്വ മോടിവാലെ, ആഷിഷ് എം ഹത്രെ. സംഗീതം – അജയ്- അതുൽ, പശ്ചാത്തല സംഗീതം – സഞ്ചിത് ബൽഹാറ, അങ്കിത് ബൽഹാറ എന്നിവർ നിർവ്വഹിക്കുന്നു.
Story Highlights: Adipurush release date
